Pas nxehtësisë së fortë të fundjaves dhe paradites së djeshme moti u feskua nga rrebeshet e shiut anembanë vendit duke ulur temperaturat. Vende-vende pati rrebeshe intensive shiu të cilat ishin shumë të mirëseardhura.
Me ardhjen e masave ajrore të paqëndrueshme temperaturat kanë pësuar ulje të lehta edhe në viset bregdetare, por rrebeshet atje janë më të rralla dhe më të izoluara, prandaj siç kemi theksuar rrebeshe shiu priten kryesisht në viset kontinentale e veçanërisht në Kosovë dhe disa vise në Maqedoninë Veriore. Rrebeshet e shiut do të paraqiten edhe në Shqipëri duke përfshirë edhe viset bregdetare duke ulur temperaturat edhe atje, por nuk priten reshje të mëdha dhe po ashtu priten edhe intervale të gjata kohore me diell, prandaj pushuesit nuk duhet të dekurajohen edhe pse kushtet ideale për pushime nuk do të jenë. Përmirësim të motit dhe rritje të sërishme të temperaturave në bregdet parashihet të ketë nga data 4 ose 5 Shtator gjithnjë duke u bazuar në ecuritë aktuale sinoptike.
Në viset kontinentale do të vazhdojnë rrebeshet e pasditeve me vetëtima dhe bubullimë. Në disa rajone priten rrebeshe intensive dhe ndonjë shtrëngatë e fuqishme lokale./MeteoBallkan