Velipoja ndodhet në Rajonin e Shkodrës, pranë kufijve me Malin e Zi, emri Velipojë vjen nga sllavishtja e vjetër (Velikopoje – Fushë e Madhe).
Zona turistike shtrihet në një sipërfaqe 300 ha dhe kufizohet në veri me rezervatin e Menaxhuar të Velipojës, në jug me detin Adriatik, në lindje me rrethin e Lezhës dhe në perëndim me lumin Buna.
Pushuesit me te shumte ne plazhin e Velipojës janë qytetarë nga Kosova që janë të përvitshëm në këtë plazh.
Pushues nga Kosova shfrytëzojnë edhe linjën e trageteve përmes Komanit për të mbërritur e pushuar në këtë plazh.
Investimet dhe shërbimi cilësor kanë bërë që në bregdetin e Velipojës të jene rreth 70 mijë pushues ditorë, kryesish në fundjavë, shkruan Gazeta Metro.
Edhe infrastruktura rrugore që lidh veriun e vendit me këtë plazh ka ndikuar pozitivisht.
Velipoja u ofron pushuesve mundësinë për të kaluar pushime në një vijë bregdetare me ujë të pastër dhe me rërë të imët, por jo vetëm kaq, pasi plazhi është i pasur me vlera unike natyrore si, ranishtja e madhe me gjatësi 14 km rërë të imët dhe të pastër, qe quhet nga banorët “râna e dermanit” për vetitë e saja kuruese.
Plazhi ripërtërihet çdo vit nga baticat dhe zbaticat.