I ashtuquajturi anticikloni i Azoreve ka bërë ekspansion në drejtim të Evropes këto ditë duke rritur temperaturat dhe duke përmirësuar motin në shumë vende evropiane pas goditjes së fortë dimërore të ditëve dhe javëve të kaluara.
Ky anticiklon nga sot ka arritur edhe në Ballkan dhe siç po shihet atmosfera është stabilizuar plotësisht. Reshjet atmosferike janë ndalur dhe vranësirat janë larguar.
Po ashtu tani priten edhe rritjet e temperaturave, ngase rrymimet ajrore do të vijnë nga jugperëndimi i Evropes.
Mot stabil dhe pa reshje atmosferike na pret disa ditë, por ndoshta jo për shumë gjatë. Karakteristikë e këtyre ditëve mund të jetë edhe inversioni i temperaturave, për shkak të krijimit të mjegulles ose vranësirave të ulëta nëpër disa lugina dhe ultësira mund të ndodhë që shumë më ngrohtë të jetë në viset kodrinore-malore se sa në disa zona më të ulëta të vendit. Kjo ndodhë për shkak të ftohjes dhe pastaj kondensimit të ajrit të ftohtë i cili mbetet “i ngujuar” brenda disa zonave të ulëta, ndërsa rrezet diellore rrisin temperaturat në zonat malore.
Sipas ecurive aktuale sinoptike anticikloni do të jetë shumë aktiv në viset tona vetëm tri ditë, ngase dikur nga dita e enjte do të fillojë ulja e presionit atmosferik dhe kjo nënkupton dobësimin e mases ajrore anticiklonike dhe afrimin e fronteve eventuale nga Atlantiku që mund të kushtëzojnë ndonjë reshje atmosferike.
Me dobësimin e anticiklonit frontet nga Atlantiku do ta kenë më lehtë të depërtojnë drejt jugut, ndërsa temperaturat do të rriten nga nesër duke zbutur edhe acarin e natës dhe mëngjesit.
Megjithatë, acar kryesisht të dobët do të ketë edhe netëve të ardhshme, me kohëzgjatje më të madhe në ato zona ku eventualisht do të vijë deri te inversioni i temperaturave apo krijimi i mjegullnajave eventuale dhe vranësirave të ulëta./MeteoBallkan
