Java e fundit e Nëntorit do të vazhdojë të na sjellë mot të ndryshueshëm, por në përgjithësi pritet mot tipik sikur mbajti gjatë tërë muajit Nëntor.
Fillimi i javës do të jetë më i ftohtë me vranësira të shumta dhe vende-vende me reshje shiu, ndërsa në viset e larta malore priten reshje bore. Reshje më intensive shiu priten në Shqipëri dhe Maqedoninë e Veriut, kurse reshje shumë të dobëta priten në Kosovë dhe Mal të Zi. Në disa rajone në Kosovë dhe Mal të Zi nuk do të ketë fare reshje në këtë fillim-javë. Temperaturat do të pësojnë ulje për shkak të ciklonit të fuqishëm i cili do të sjellë mot ekstrem në Greqi dhe reshje shiu në Shqipëri dhe Maqedoninë e Veriut. Cikloni përkohësisht do të tërheqë masa të ftohta ajrore nga verilindja e Kontinentit.
Të martën moti do të qetësohet në tërë rajonin por do të jetë freskët, vende-vende ftohtë.
Nga e mërkura priten ngritje të ndjeshme të temperaturave, por njëkohësisht do të kemi afrimin e masave të reja ajrore ciklonike me origjinë nga Atlantiku. Si rezultat në disa pjesë të Shqipërisë do të fillojnë reshjet e shiut të cilat gjatë ditës së enjte do të përfshijnë tërë Shqipërinë, Kosovën, Maqedoninë e Veriut dhe Malin e Zi. Pasi që temperaturat do të jenë të larta gjatë kësaj periudhe mund të ketë edhe rrebeshe lokale shiu me vetëtima dhe bubullimë në tërë rajonin. Reshjet e shiut nuk do të jenë të pandërprera, por në mes intervaleve kohore me reshje do të ketë edhe intervale të gjata kohore pa reshje por edhe intervale kohore me diell. Pra e kemi fjalën për kushtet sinoptike nga e enjta deri të shtunën.
Të shtunën priten ulje të ndjeshme të temperaturave dhe do të ketë mundësi për reshje shiu dhe bore në viset kodrinore-malore. Reshjet e bores mund të paraqiten edhe në qytete të Republikës së Kosovës.
Të dielën priten ngritje të ndjeshme afatshkurtëra të temperaturave.
Ishte ky parashikimi javor i motit. Për çdo ndryshim eventual do të njoftoheni në postimet tona të përditshme./Meteoballkan
