Rrebeshet e shiut kanë filluar në shumë zona të Shqipërisë të cilat në orët e ardhshme do të intensifikohen. Priten rrebeshe të fuqishme lokale shiu me vetëtima dhe bubullimë. Po ashtu edhe në Kosovë orëve të ardhshme priten reshje të dendura lokale shiu dhe mund të ketë edhe rrebeshe me vetëtima dhe bubullimë.
Gjatë orëve të hershme të mëngjesit në Kosovë reshjet do të pushojnë, kështu që nesër në Kosovë pritet të mbajë mot me intervale të gjata kohore me diell dhe vranësira kalimtare. Gjatë natës së ardhme pritet të fillojnë reshje të reja shiu të cilat vende-vende mund të jenë të dendura.
Edhe në Shqipëri nesër reshjet pritet të pushojnë por jo tërësisht. Në disa rajone priten reshje të herëpashershme shiu, kurse gjatë natës së ardhshme përsëri pritet intensifikim i reshjeve.
Edhe në Maqedoninë Veriore dhe Mal të Zi gjatë natës priten reshje shiu të cilat do të pushojnë deri në mëngjes, kështu që nesër pritet mot me intervale kohore me diell dhe vranësira kalimtare.
Pasnesër në Kosovë priten reshje të dendura shiu, në viset kodrinore-malore priten reshje të dendura bore. Reshjet e borës mund të paraqiten shkurtimisht edhe në ndonjë qytet apo qytezë të Republikës së Kosovës me lartësi mbidetare të lartë. Pasdite reshjet do të pushojnë dhe do të pasojë ulja e theksuar e temperaturave si rezultat i depërtimit të ajrit të ftohtë polar. Gjatë natës mund ti kemi ngricat e para edhe nëpër ultësira.
Në Shqipëri po ashtu të shtunën pritet mot i vranët dhe me reshjet të herëpashershme shiu. Reshjet e shiut do të pushojnë pasdite dhe pritet përmirësim i motit, por do të jetë freskët.
Edhe në Maqedoninë Veriore dhe Mal të Zi pasnesër pas reshjeve të shiut pritet përmirësim i motit por do të jetë shumë ftohtë sidomos në viset kodrinore-malore.
Të dielën mjaft ftohtë dhe kthjellët, por vonë gjatë ditës pritet të rifillojnë erërat jugore dhe kështu temperaturat do të pësojnë ngritje.
Të hënën në tërë rajonin ngrohtë, kurse gjatë natës në të martën pritet të depërtojë fronti i fuqishëm i ftohtë ajror dhe në Kosovë dhe Shqipërinë verilindore do ti kemi reshjet e para të dendura të borës. Në Shqipëri reshje të dendura shiu.
Të martën në Kosovë ftohtë, dimër dhe me reshje bore, por të cilat nuk do të jenë të qëndrueshme më shumë se një ditë ose dy./Meteoballkan
