Edhe kjo javë do të karakterizohet me mot të ndryshueshëm dhe me ndryshime të shpeshta të temperaturave. Gjatë kësaj jave priten reshjet e para të dëborës në shumë rajone duke përfshirë edhe ultësirat e Kosovës dhe disa pjesë të Maqedonisë së Veriut.
Nesër do të jemi nën ndikimin e masave ajrore relativisht të nxehta dhe moti do të karakterizohet me erëra jugore, ndërsa krejt e kundërta do të jetë pasnesër, pra do të jemi nën ndikimin e masave të ftohta ajrore dhe erërave veriore. Gjithashtu priten edhe reshje atmosferike, shi në bregdet dhe shumicën e territorit të Shqipërisë, borë në Kosovë, disa pjesët të Maqedonisë dhe veriun e Malit të Zi.
Të mërkurën do të mbetemi nën ndikimin e masave të ftohta ajrore por më nuk do të ketë reshje atmosferike. Nata do të jetë me acar në viset kontinentale të rajonit.
Nga e enjta përsëri do të fillojë ngritja graduale e temperaturave, por mëngjeset dhe netët do të jenë ende mjaft të ftohta dhe me ngrica. Erërat do të fillojnë të fryjnë përsëri nga jugu të cilat do të ndikojnë në ngritjen graduale të temperaturave. Fundjava do të na sjellë mot tipik vjeshtor, me vranësira të herëpashershme dhe reshje kryesisht të dobëta dhe të rralla shiu. Në viset malore reshje të dobëta bore.
Ishte ky parashikimi i motit për javën që po hymë me disa fjalë, ndërsa për detaje tjera dhe për çdo ndryshim eventual do të njoftoheni në informacionet tona të përditshme./Meteoballkan