Java që po hymë më shumë do ti ngjajë vjeshtës se sa dimrit, ndërsa në disa rajone (mesdhetare) edhe pranverës.
Gjatë tërë javës Kosova, Shqipëria dhe tërë rajoni do të jenë nën ndikimin e masave ajrore të thata dhe stabile anticiklonike. Për pasojë moti do të karakterizohet me rreze të shumta diellore gjatë ditëve, por meqenëse jemi në Janar netët dhe mëngjeset do të jenë me ngrica. Karakteristikë tjetër gjatë kësaj jave mund të jetë edhe mjegulla ose vranësirat e ulëta nëpër disa lugina dhe ultësira. Nëse do të ketë mjegull ose vranësira të ulëta atëherë do të vije deri të inversioni i temperaturave dhe kjo do të thotë se më nxehtë gjatë ditëve do të jetë në viset kodrinore-malore se sa nëpër ultësira. Kuptohet në ato rajone ku eventualisht do të ketë mjegull ose vranësira të ulëta. Pasi që rrymimet ajrore do të jenë të dobëta gjatë kësaj jave do të vije deri të përkeqësimi i kualitetit të ajrit prandaj apelojmë për kujdes sidomos nëpër qytete dhe zona të industrializuara. Ajri më i mirë dhe i pastër do të jetë në viset kodrinore-malore.
Edhe pse jemi në mes të dimrit masa ajrore relativisht të nxehta na presin edhe këtë javë.
Modelet globale numerike për parashikim të motit në fundjavë parashohin ndryshimin e gjendjes sinoptike në rajonin tonë. Masat ajrore anticiklonike do të fillojnë të dobësohen dhe mbi rajon do të ketë mundësi depërtimi i një cikloni nga Deti Adriatik i cili do të na sjellë reshje atmosferike. Këto masa ajrore të lagshta me origjinë nga Atlantiku do të na sjellin edhe reshje bore në fundjavë, por pasi që kemi të bëjmë me një periudhë prej më shumë se 5 ditë nuk duhet të ngutemi me konkluzione sepse ndryshimet mund të ndodhin. Sipas kësaj nga e diela parashihet edhe depërtimi i masave të ftohta ajrore nga veriu dhe verilindja e Evropës. Mbetet të shihet evoluimi i situatës sinoptike./Meteoballkan
