Cikloni i fuqishëm Kiara i cili po shkakton erëra ekstremisht të fuqishme në Evropë është duke ndikuar me periferinë e tij edhe në kushtet sinoptike në rajonin tonë, por erërat tek ne nuk do të jenë aq të fuqishme sikur në Evropë.
Gjatë kësaj jave moti në rajonin tonë do të jetë i paqëndrueshëm dhe si pasojë i ndryshueshëm. Priten edhe reshje të herëpashershme afatshkurtra atmosferike por nuk priten reshje intensive. Nëpër ultësira do të ketë reshje shiu, ndërsa reshje bore vetëm në viset kodrinore-malore. Gjithashtu priten edhe intervale kohore me diell dhe luhatje të temperaturave por temperaturat do të mbesin mbi mesataren për këtë periudhë kohore.
Nesër dhe pasnesër na pret mot pak më i freskët sidomos nga pasditja e nesërme për shkak të depërtimit të një fronti të dobët të ftohtë ajror i cili do të sjellë vranësira dhe reshje kryesisht të dobëta lokale shiu.
Të mërkurën priten ulje të lehta të temperaturave dhe reshje të dobëta bore në viset viset malore, kurse të entjen dhe të premtën priten ngritje të ndjeshme të sërishme të temperaturave. Të premtën vonë do të kemi një ciklon tjetër nga Atlantiku i cili do të na sjellë reshje kalimtare shiu, kurse në viset malore reshje bore.
Të shtunën ulje të lehta të temperaturave, kurse nga e diela përsëri do të kemi ngritje të ndjeshme të temperaturave. Në përgjithësi reshjet atmosferike këtë javë nuk do të jenë të mëdha por as gjithëpërfshirëse, pra do të ketë rajone ku nuk do të bije asnjë pikë shi.
Ishte ky parashikimi i motit për këtë javë shkurtimisht me disa fjali. Për shkak se kemi Oqeanin Atlantik jashtëzakonisht aktiv ndryshimet në parashikim mund të ndodhin sepse modelet mund të gabojnë në “leximin” e saktë të dinamikave të atmosferës gjatë kësaj jave. Sidoqoftë, për çdo ndryshim eventual ne do tu njoftojmë me kohë në postimet tona të përditshme./Meteoballkan
