Stuhia më e fuqishme e borës e këtij dimri pritet pikërisht në ditën e parë të Prillit dhe kjo nuk është asgjë e jashtëzakonshme duke pasur para sysh se kemi pasur një dimër mjaft të butë sivjet dhe se natyra i ka metodat e saj të kompensimit.
Sidoqoftë, sot kemi depërtimin e ajrit të ftohtë polar nga veriu dhe si rezultat do të kemi krijimin e një cikloni në jug të Detit Adriatik i cili shumë shpejt do të rrugëtojë në drejtim të Shqipërisë, Maqedonisë së Veriut dhe Greqisë. Ky ciklon do të tërheqë sasi të madhe të ajrit të lagësht nga Mesdheu dhe për këtë arsye priten reshje të dendura atmosferike. Në viset bregdetare priten reshje mjaft të dendura shiu, kurse në viset mesdhetare do të kemi reshje mjaft të dendura bore.
Reshje bore sonte do të fillojnë në Kosovë dhe këto reshje pritet të intensifikohen gjatë natës dhe ditës së nesërme. Në tërë territorin e Republikës së Kosovës pritet krijimi i shtresave të borës duke përfshirë edhe ultësirat. Në viset kodrinore-malore do të ketë reshje intensive bore deri në 30 cm., lokalisht edhe më shumë. Nëpër ultësira trashësia e borës do të jetë afërsisht nga 8 deri në 25 cm.
Reshje të fuqishme bore priten edhe në veri dhe lindje të Shqipërisë, kurse reshjet më intensive apo më të fuqishmet pritet të jenë në Maqedoninë e Veriut ku trashësia e borës pritet të arrijë deri në gjysmë metër në disa rajone kodrinore-malore. Reshjet e borës do të paraqiten shkurtimisht edhe në disa rajone ku bora është dukuri e rrallë me përjashtim të perëndimit dhe jugut të skajshëm të Shqipërisë.
Temperaturat do të pësojnë ulje të theksuara dhe gjatë netëve të ardhshme mund të ndodhë që të kemi acar të fortë, por kjo do të varet nga vranësirat gjatë natës. Nëse gjatë natës moti kthjellohet tërësisht atëherë rreziku për acar është i madh, por të shpresojmë që gjatë netëve të ardhshme të kemi vranësira dhe në këtë mënyrë pemët dhe kulturat tjera do të shpëtonin.
Të enjtën na pret mot i freskët dhe pa reshje atmosferike./Meteoballkan
