Në këto çaste ende jemi nën ndikimin e masave mjaft stabile ajrore anticiklonike, por atmosfera përreth nesh ka filluar të dinamizohet pak a shumë edhe pse ende në distancë të madhe gjeografike. Në Rusinë perëndimore kemi një ciklon të shtresave të larta atmosferike të pajisur me ajrin e ftohtë polar. Ky ciklon është i dobët në aspektin e reshjeve atmosferike, por jo në aspektin e ajrit të ftohtë. Pikërisht kjo masë ajrore do të vije tek ne krejt në fund të Nëntorit dhe fillim të Dhjetorit.
Në anën tjetër në Afrikën Veriore dhe Gadishullin Iberik kemi ciklonin e fuqishëm i cili do të vije tek ne, por në formë të dobësuar. Cikloni do të rrugëtojë në Detin Jon dhe pastaj në drejtim të Greqisë dhe Turqisë.
Në Shqipëri ky ciklon do të sjellë reshje lokale shiu, ndërsa në Kosovë reshje sporadike bore natën mes së dielës dhe mëngjesin e së hënës. Ajo që vlenë të përmendet është ulja e temperaturave si pasojë e ajrit të ftohtë polar. Gjatë depërtimit të ajrit të ftohtë polar do të kemi përmirësimin e dukshëm të cilësisë së ajrit.
Pra, sipas ecurive më të fundit sinoptike edhe kjo goditje polare nuk do të na sjellë reshje të kënaqshme, por simbolike. Reshje të reja atmosferike do të kemi gjatë javës , por sipas të gjitha gjasave ato do të vijnë në formë shiu tek ne. Ne do të përcjellim evoluimin e gjendjes sinoptike vazhdimisht dhe do ju njoftojmë me kohë./Meteoballkan