Cikloni i cili para dy tre ditësh u krijua në veriun e Italisë tani gjendet në brigjet e Afrikës Veriore respektivisht në Tunizi dhe Libi. Nuk është bash e zakonshme që cikloni të ketë këtë rrugëtim pra nga Italia veriore në drejtim të Afrikes Veriore. Kjo ndodh vetëm një ose dy herë në vit. Ky ciklon tani po kthehet përsëri nga Afrika Veriore në drejtim të Italisë Veriore dhe Ballkanit verior. Përpos kthimit në rrugën nga cila ka ardhur ky ciklon do të shkaktojë edhe ngritje të temperaturave në rajonin tonë.
Ky ciklon do të sjell reshje lokale në Shqipëri kurse reshjet të fuqishme do ti sjell bregdetit që nga Mali i Zi e deri në Slloveni. Në viset kontinetale nuk do të ketë reshje të fuqishme.
Përpos temperaturave të nxehta ky ciklon ose masa ajrore që e përbën ky ciklon do të na sjell edhe pluhur nga Afrika Veriore sepse kjo masë ajrore ka përthithur pluhur të Shkretëtirës së Saharasë gjatë qëndrimit të saj në Libi dhe Tunizi. Gjatë fundjavës dhe fillimin e javës së ardhshme reshje lokale të dobëta shiu mund të ketë edhe në Kosovë dhe ndonjë pjesë të Maqedonisë. Përndryshe Evropa perëndimore është përfshirë nga masa ajrore me presion të lartë atmosferik apo anticiklon i fuqishëm i cili është përgjegjës për thatësinë e këtyre ditëve si në Evropë po ashtu edhe në viset tona. Gjatë muajit Tetor ka mundësi që të përjetojmë të ashtuquajjturën “verë indiane” e cila karakterizohet me mot stabil dhe me shumë rreze dielli si dhe me temperatura pranverore. Këtë do ta mundësojë krijimi i blloqeve anticiklonike të fuqishme të cilat nuk do të lejojnë depërtimin e masave ajrore të lagshta, të ftohta dhe jostabile nga Atlantiku apo Mesdheu në drejtim të Evropës dhe rajonit tonë. Pra Muaji Tetor sipas të gjitha gjasave do të jetë mjaft i thatë dhe po ashtu i nxehtë.
Këto ishin të dhënat më të fundit sinoptike për periudhën e ardhshme pra nuk do të kemi ndonjë ndryshim të motit dhe as reshje përpos gjatë fundjavës. Kjo nuk do të thotë se dimri do të jetë i butë përkundrazi nëse gjatë kësaj koje kemi deficit të madh të të reshurave atmosferike dhe temperatura të larta atëherë muaji Nëntor dhe Dhjetor mund të jenë mjaft të bujshëm sa iu përket reshjeve atmosferike. Të shohim./Meteoballkan
