Pas një periudhe mjaft të gjatë të dominimit të fushave ajrore të thata anticiklonike në rajonin tonë siç duket pas mesit të javës që po hymë do të kemi reshje atmosferike të cilat fillimisht do të jenë në formë të shiut, ndërsa me uljen e temperaturave do të shndërrohen në reshje bore. Vende-vende dhe herë pas here priten reshje të dendura bore të cilat do të jenë mjaft estetike për syrin e entuziastëve të dimrit.
Goditja polare një herë për njëherë nuk pritet të jetë e fuqishme, por e moderuar, ndërsa fronti pritet të jetë i pasur me lagështi dhe kjo na duhet në këtë kohë thatësie ekstreme.
Fillimisht gjatë javës do të kemi ngritje të temperaturave për shkak se para ardhjes së frontit të fuqishëm të ftohtë mbi rajonin tonë do të fryjnë erëra të ngrohta jugore, ndërsa me ardhjen e frontit të ftohtë do të fillojnë të fryjnë erëra të ftohta veriore të cilat do të jenë të shoqëruara edhe me reshje bore.
Reshje bore priten në shumicën e territorit të Republikës së Kosovës, Maqedonisë së Veriut dhe Malit të Zi si dhe në veri, verilindje, lindje, juglindje dhe disa pjesë në qendër të Shqipërisë varësisht nga lartësia mbidetare dhe pozita gjeografike.
Sasia e reshjeve ende mund të ndryshojë nga vendi në vend dhe nga dita në ditë, varësisht nga lëvizjet e masave ajrore, pozicionimi i saktë i ciklogjenezës në Adriatik dhe për këtë do të jemi “më të mençur” pas dy ditëve.
Fronti i ftohtë polar nuk do të zgjasë shumë, dhe pas një dite ose dy do të ketë ngritje të lehta të temperaturave dhe masa të reja ajrore ciklonike do të na afrohen nga Atlantiku duke sjellur mundësi të reja për reshje të përziera atmosferike varësisht nga temperaturat./Meteoballkan
