Sot në Kosovë pritet të mbajë mot me vranësira të dendura dhe mjaft i ftohtë për këtë periudhë kohore. Do të ketë reshje shiu e në viset kodrinore-malore priten reshje shqote e bore. Do të fryjnë erëra të ftohta nga veriu e verilindja. Në mbrëmje kthjellim gradual i motit dhe gjatë natës ulje e temperaturave në disa rajone deri në 1 apo 0 gradë Celsius deri para agimit. Në viset malore temperatura mund të kalojë në pak “minus”.
Temperatura maksimale do të arrijë deri në 11 gradë Celsius.
Në Shqipëri, Maqedoninë Veriore, Luginë të Preshevës dhe Mal të Zi pritet të mbajë mot me vranësira dhe reshje shiu e në viset malore do të ketë reshje bore. Atmosferë vjeshte në shumë zona e në viset e larta malore atmosferë dimri. E tëra do jetë kalimtare.
Të premten pas një mëngjesi të ftohtë dita vijon me vranësira e intervale kohore me diell. Reshje të pakta lokale mund të ketë në disa rajone, por asgjë serioze. Temperaturat do të fillojnë të rriten menjëherë, por erërat mbesin prezente të ftohta nga veriu.
Fundjava vjen kryesisht me diell në Shqipëri e vranësira të herëpashershme në shumë pjesë të Kosovës dhe Maqedonisë së Veriut. Reshjet do të jenë të pakta dhe të izoluara. Temperaturat në rritje graduale dhe stabilizim gradual i motit, megjithatë ende mbetet paksa ftohtë sidomos në disa zona kontinentale të Kosovës dhe Maqedonisë së Veriut. Nga e hëna ndjeshëm më ngrohtë./MeteoBallkan
