Cikloni nga Adriatiku dhe fronti i ftohtë nga veriu tanimë janë afruar rajonit tonë dhe në malet e Bosnjës dhe Kroacisë kanë filluar reshjet e borës. Ne gjendemi ende në sektorin e nxehtë të masave ciklonike dhe reshjet lokale janë në formë shiu. Fronti i ftohtë do të lëvizë shumë ngadalë në drejtim të territorit tonë duke arritur tek nesër, përderisa do të jetë në luftë të vazhdueshme me frontin e nxehtë nga Mesdheu pikërisht mbi territoret tona. Për këtë arsye priten reshje të dendura shiu, ndërsa nesër (e shtunë) reshje e shiun do të fillojnë të shndërrohen në reshje bore fillimisht në kodrinore-malore të Kosovës e pastaj me uljen e temperaturave edhe në viset tjera.
Vende-vende dhe herë pas here priten reshje të dendura bore. ndërsa duhet nënvizuar edhe njëherë se për shkak të prezencës së frontit të nxehtë mesdhetar disa ultësira mund të përfitojnë vetëm reshje shqote ose reshje simbolike bore. Rreziku për këtë ekziston në ultësirat e Anamoravës dhe disa ultësira të Dukagjinit ato rajone ku reshjet borët zakonisht janë më të rralla.
Sidoqoftë, kjo është gjendja momentale sinoptike: pra, priten reshje të dendura shiu të cilat do shndërrohen në reshje të dendura estetike bore .Në viset kodrinore-malore do të formohen shtresa solide bore, ndërsa shtresa bore mund të krijohen edhe në disa ultësira, por të cilat do të shkrihet pastaj shumë shpejt.
Reshjet që po vijnë janë shumë të rëndësishme për shkak të thatësisë ekstreme. Po ashtu gjatë fundjavës përpos reshje të shiut dhe borës dhe mundësisë për alternimin e këtyre reshjeve nga shiu në borë dhe anasjelltas, ka gjasa që në disa rajone të bije edhe shi i akullt. Kjo ndodhë për shkak të ngritjes së temperaturave në shtresa të larta atmosferike dhe bora shndërrohen në shi, por afër sipërfaqes së tokës temperaturat janë të ulëta dhe pikat e shiut shndërrohen në akull, prandaj duhet kujdes i jashtëzakonshëm në komunikacion.
Pas monotonisë maratonike meteorologjike më në fund po hyjmë në një fazë me mot mjaft dinamik dhe me reshje atmosferike. Edhe pse ne të gjithë entuziastët e borës nuk do të jemi të kënaqur duhet ta shohim anën pozitive sepse çdo reshje atmosferike është shumë e rëndësishme në këtë kohë thatësie. Kjo nuk do të thotë se nuk do të ketë borë, por do të jetë afatshkurtër.
Për reshje dhe atmosfere të vërtetë dimërore duhet të presim Janarin, Shkurtin dhe Marsin ngase për këtë nevojitet një sasi shumë më e madhe ajrit polar ose siberik që për momentin assesi nuk po gjene rrugë për të depërtuar në rajonin tonë për shkak të gjendjes sinoptike.
