Kroacia nuk gjen paqe, ndërsa vendi është goditur sërish dje nga një lëkundje e fortë tërmeti, me magnitudë 5, duke ngjallur frikë e panik tek njerëzit.
Epiqendra ishte në afër Petrinja, 445 kilometra në juglindje të Zagrebit. Lëkundja u ndje edhe në Kroacinë qendrore, e po ashtu edhe në kryeqytetin Kroat, Zagreb.
Ndërkohë, në 72 orët e fundit janë regjistruar 54 lëkundje tërmeti.
Disa ndërtesa u dëmtuan, ndërsa nuk ka ende të dhëna për viktima.
Më 29 dhjetor Kroacia u trondit nga një lëkundje e fuqishme me magnitudë 6.2, që i mori jetën 7 personave dhe la të plagosur dhjetëra të tjerë.
Kryetari i Komunës së Petrinjës komentoi mbi situatën në qytet pas një tërmeti të ri të fortë.
“Gjithçka që është riparuar sot dhe këto ditë është shembur përsëri, pllaka dhe oxhakë janë shembur, dhe në qendër të qytetit kemi një problem të madh – qyteti është bërë përsëri një gërmadhë pas gjithë këtyre rrënojave që kemi pasur që jep mesazhin se jeta në qytet nuk do të jetë në mënyrën si e kemi pasur deri më tani, ky është sugjerimi im. Ne duhet të marrim të gjitha masat e sigurisë. Masat e ardhjes në qytet, për të kontrolluar kush vjen, pse vjen. Ne nuk do të jemi në gjendje të rehabilitojmë jetën tonë dhe kjo është arsyeja pse unë mendoj se qendra e qytetit duhet të evakuohet për shkak të rreziqeve të tilla. Kur shohim sa rrënoja ka tani, ne me të vërtetë kemi një problem të madh,” tha Dumbovic.