Situata sinoptike në Evropë do të fillojë të ndryshojë gradualisht ditëve të ardhshme dhe kjo nënkupton se edhe tek ne më në fund do të kemi ndryshim të kushteve sinoptike.
Anticikloni i fuqishëm i cili ka krijuar një bllokadë totale anticiklonike do të fillojë të dobësohet dhe kjo do të mundësojë fillimin e depërtimit të masave ajrore të ftohta dhe të lagshta në rajonin tonë nga veriu i kontinentit.
Sipas të gjitha gjasave kjo do të ndodh nga dita e Diel kur edhe priten reshje shiu në pjesën më të madhe të Kosovës, Maqedonisë dhe Shqipërisë. Stuhi të fuqishme me rrebeshe, vetëtima dhe bubullimë priten në territorin e Greqisë. Në Kosovë, Shqipëri dhe Maqedoni këto reshje do të jenë shumë të mirëseardhura për shkak të thatësisë së madhe që ka përfshirë rajonin tonë. Në viset malore ka gjasa që të kemi edhe reshje bore.
Informacione tjera më të sakta dhe me më shumë detaje do të kemi ditëve të ardhshme./Meteoballkan
