Sot në pjesët veriore të Oqeanit Atlantik ndodhet një ciklon jashtëzakonisht i fuqishëm. Qendra e ciklonit gjendet në juglindje të Islandës dhe ky ciklon rajonit të Atlantikut po i shkakton erëra uraganike deri në 160 km/h, valët e Oqeanit kanë lartësi deri në 7 metra ndërsa stuhi të fuqishme kanë përfshirë edhe pjesët veriperëndimore të Evropës dhe Ishujt Britanik.
Në kuadër të cikloni gjendet edhe fronti i fuqishëm i cili shtrihet deri në jug afër Gadishullit Iberik, kështu që ky front do të sjellë shira të fuqishëm dhe erëra të fuqishme Spanjës dhe Portugalisë. Pjesët veriperëndimore të Spanjës si dhe pjesa veriore e Portugalisë të Mërkurën do të përfshihen nga stuhi dhe reshje ekstremisht të fuqishme të cilat do të shkaktojnë edhe vërshime të paevitueshme. Njëkohësisht në Ishujt Britanik do të formohet një ciklon sekundar dhe një valë e re reshjesh ekstreme do të përfshijë Mesdheun Qendror dhe Jugor. Aktivitetet e fuqishme ciklonike në Oqeanin Atlantik janë përgjegjëse për depërtimin e mëtutjeshëm të ajrit të nxehtë nga Afrika Veriore dhe Mesdheu në drejtim të rajonit tonë.
Përderisa disa pjesë të Evropës Perëndimore pritet të goditen nga ciklonet që vijnë nga Atlantiku Evropa Lindore është fuqishëm nën ndikimin e Anticiklonit me qendër në Rusinë perëndimore.Ky anticiklon i fuqishëm mban nën kontroll motin në Evropën lindore dhe juglindore ku gjendemi edhe ne. Anticikloni i fuqishëm nga lindja edhe në të ardhmen do të pengojë me sukses depërtimin e masave ajrore të lagshta dhe jostabile nga Atlantiku dhe Mesdheu në drejtim të rajonit tonë. Kjo i bjen se tek ne edhe disa ditë do të vazhdojë të mbajë mot stabil , i thatë pra pa reshje atmosferike dhe kryesisht kthjellët, por njëkohësisht edhe mjaft nxehtë për peridhën kohore në të cilën gjendemi.
