Pas një periudhe shumë të gjatë të thatësisë ekstreme sidomos në Shqipëri po shtohen gjasat që të ketë rrebeshe shiu gjatë mesjavës.
Fillimisht priten rritje të mëtutjeshme të temperaturave gjatë fillimit të javës së re, ndërkohë që nga veriperëndimi i Kontinentit kemi afrimin e një fronti të fuqishëm të ftohtë ajror.
Të martën pasdite vonë në Kosovë priten rrebeshe të izoluara shiu me vetëtima dhe bubullimë, ndërsa të mërkurën fronti i ftohtë do të depërtojë gradualisht edhe në Shqipëri për të ulur temperaturat dhe duke kushtëzuar edhe rrebeshe lokalisht të fuqishme shiu me vetëtima dhe bubullimë. Rrebeshet kësaj radhe do të përfshijnë edhe bregdetin shqiptar duke përfshirë edhe perëndimin dhe jugun e vendit. Rrebeshet e shiut do të paraqiten nganjëherë të mërkurën dhe të enjtën përgjatë bregdeti shqiptar, ndërsa nga e premta pritet stabilizim i motit dhe rritje e temperaturave, por nuk pritet i nxehtë i madh, pra pritet mot i këndshëm veror pas shiut.
Rrebeshe shiu të mërkurën dhe të enjtën priten edhe në Kosovë, Mal të Zi, Luginën e Preshevës dhe pjesë të Maqedonisë së Veriut. Vende-vende priten rrebeshe intensive të cilat sadopak do ta zbusin thatësinë ekstreme, por normalisht reshjet nuk do të jenë të mjaftueshme sepse thatësia është shumë e madhe dhe ka zgjatur me muaj të tërë. Po ashtu duhet theksuar se reshjet nuk do të jenë të barazpeshuara në tërë territorin. Në disa vise priten reshje shumë më intensive, ndërsa në disa vise reshje më të pakta.
Edhe pse në Kosovë kohëve të fundit kemi mot pak më të freskët dhe jo ekstremisht të nxehtë, ky front i ftohtë do të jetë mjaft i rëndësishëm për Shqipërinë e cila po vuan për një kohë mjaft të gjatë nga thatësia dhe nxehtësia e pandërprerë dhe intensive./Meteoballkan
