Pas disa ditëve mjaft të këndshme vjeshtore shumë shpejt pritet ndryshim i motit për shkak të ardhjes së një fronti të ftohtë ajror i cili nuk pritet të jetë shumë i fuqishëm, por pritet të kushtëzojë reshje lokale shiu.
Vranësirat në kuadër të frohtit kanë përfshirë shumë pjesë të rajonit tonë duke përfshirë edhe shumë territore tona, ndërsa reshje lokale shiu ka në veriperëndim të Shqipërisë.
Fronti do të arrijë nesër në Kosovë dhe Shqipëri duke kushtëzuar reshje lokale shiu. Reshjet më të theksuara priten në veriperëndim të Shqipërisë ku priten edhe rrebeshe lokalisht të fuqishme dhe ndonjë shkarkesë atmosferike.
Reshje lokale shiu priten gjatë ditës së nesërme edhe në Kosovë. Në disa rajone mund të ketë intervale reshjesh të dendura shiu dhe mund të ketë edhe rrebesh me bubullimë, por në përgjithësi nuk priten reshje të mëdha.
Temperaturat pritet të shënojnë ulje, ndërsa pas kalimit të frontit mbi rajonin tonë do të vendoset një masë e fuqishme anticiklonike e cila do të kushtëzojë ndaljen e reshjeve atmosferike dhe kthjellimin gradual. Temperaturat do të shënojnë ulje të mëtutjeshme, por jo për shumë gjatë.
Nga e diela stabilizim i motit dhe kthjellim gradual. Netët dhe mëngjeset pritet të jenë të ftohta dhe me ngrica lokale. Nëpër lugina mund të ketë mjegull, ndërsa gjatë ditëve të javës së re temperaturat do të fillojnë të rriten përsëri./Meteoballkan