Edhe pse parashikimet afatgjata po bëhen gjithnjë e më të komplikuara për shkak të laramanisë së modeleve globale për parashikim të motit, ku kemi shumë modele të cilat japin versione të ndryshme për gjendjen sinoptike dhe ecuritë termodinamike, megjithatë tendencat ose trendi për gjysmën e dytë të Nëntorit është në favor të ules së temperaturave ku që nga java e ardhshme do të kemi një goditje të mundshme polare e cila do të hetohet për shkak se priten ulje të ndjeshme të temperaturave dhe erëra mjaft të ftohta veriore. Ende është e paqartë nëse do të kemi reshje atmosferike pak më intensive apo thjesht simbolike.
Bllokadat e mundshme anticiklonike në Atlantik dhe Skandinavi mund të hapin një korridor për depërtimin e ajrit të ftohtë polar nga Rusia dhe Siberia në drejtim të rajonit tonë. Mesdheu do të reagonte me ndonjë ciklon i cili mund të kushtëzonte edhe reshje bore, por të gjitha këto janë thjeshtë vetëm opcione të mundshme.
Një është e sigurtë se nga java tjetër priten ulje të ndjeshme të temperaturave dhe bazuar në ecuritë aktuale sinoptike kjo do të pasonte me fronte të reja të ftohta pas disa ditëve tjera të cilat pritet të na sjellin reshjet e para të borës, megjithatë pas uljes së temperaturave që priten javës tjetër parashikimi mund të ndryshojë fare lehtë për periudhën e mëtejme dhe për çdo ndryshim eventual ne do tju lajmërojmë në postimet tona të përditshme.
Stuhitë të cilat dikush i lajmëroi për gjysmën e parë të Nëntorit nuk arriten në Kosovë, dhe përpos disa viseve të Shqipërisë që nganjëherë përfituan reshje gati i tërë rajoni ka anomali negative. Krejt tjetër histori është nga Mali i Zi e tutje e sidomos në Bosnjë dhe Hercegovinë ku pati reshje shumë intensive shiu dhe vërshime të mëdha.
Gjysma e dytë e Nëntorit na premton mot më të ftohtë, por sa do të zgjasë i ftohti dhe a do të na sjellë reshje bore kjo ende mbetet mister./MeteoBallkan
