Nesër në Kosovë pritet të mbajë mot me intervale të shkrurtra kohore me diell dhe vranësira të cilat në disa rajone pritet të sjellin reshje të herëpashershme bore. Temperaturat pritet të luhaten nga -5 ajo minimalja deri në 5 gradë Celsius ajo maksimale.
Në Shqipëri nesër do të mbajë mot kryesisht i vranët dhe me reshje shiu e bore. Përpos shiut reshje bore mund të ketë edhe në viset bregdetare në qendër, perëndim dhe jug të vendit. Reshje bore mund të ketë edhe në Tiranë. Fjolla të dobëta bore mund të ketë edhe në veriperëndim të vendit.
Reshje bore gjatë natës, mëngjesit dhe paradite mund të ketë në Tiranë, Lezhë, Durrës, Kavajë, Divjakë, Lushnje, Berat etj. dhe disa vise tjera ku bora është fenomen mjaft i rrallë. Normalisht reshjet e borës nuk do të zgjasin dhe priten edhe reshje të përziera me shi dhe reshje shiu. Reshje të dendura bore përsëri priten në disa vise në qendër të vendit dhe normalisht në juglindje dhe lindje të Shqipërisë.
Reshje bore nesër priten edhe në perëndim, jugperëndim të Maqedonisë së Veriut dhe veri të Malit të Zi, ndërsa në Luginën e Preshevës priten vranësira dhe rrallëherë fjolla bore.
Nga e mërkura na pret mot me intervale kohore me diell dhe vranësira lokale. Rrallëkund priten fjolla të herëpashershme bore. Pritet stabilizim gradual i motit, por mbetet ftohtë sidomos netëve dhe mëngjeseve kur pritet edhe acar. Acar i fortë në viset kodrinore-malore./MeteoBallkan
