Vendi ynë ditëve të fundit ka qenë nën ndikimin e masave mjaft të fuqishme, të thata anticiklonike dhe për këtë arsye kemi pas mungesë të madhe të reshjeve atmosferike, por kjo po ndryshon dhe ditëve në vijim do të kemi shira të shumëpritur që do ndikojnë shumë mirë në përmirësimin e gjendjes së përgjithshme hidrologjike në rajonin tonë duke përfshirë edhe Kosovës.
Masa ajrore mjaft të fuqishme ciklonike po depërtojnë në Itali, Detin Adriatik dhe Evropen qendrore duke kushtëzuar ndryshim të motit dhe kushte për reshje atmosferike edhe në Ballkan. Reshje mjaft të fuqishme shiu priten që nga Sllovenia, Kroacia, Bosnja dhe Hercegovina, Mali i Zi dhe Shqipëria. Reshje shiu priten edhe në Kosovë dhe Maqedoninë e Veriut. Shumë vise të Ballkanit priten reshje të rrëmbyeshme shiu që mund të shkaktojnë edhe probleme si në Dalmaci, Hercegovinë, Mal të Zi dhe pjesë të Shqipërisë.
Reshjet më të fuqishme të shiut priten në veriun e Shqipërisë, Mal të Zi dhe Hercegovinë, por reshje mjaft intensive priten edhe në qendër të Shqipërisë si dhe në jugun e skajshëm të vendit. Reshje intensive shiu mund të ketë edhe në rajonin e Dukagjinit në Kosovë, lokalisht edhe në disa vise tjera të Kosovës dhe Maqedonisë së Veriut.
Masat ajrore ciklonike pritet të jenë prezente me ditë të tëra, ndoshta edhe me javë, prandaj gjatë ditëve të ardhshme priten reshje të shpeshta, por reshjet nuk do të jenë të pandërprera, prandaj priten edhe periudha të gjata pa reshje fare sidomos në Kosovë. Përpos reshjeve të shiut, nganjëherë priten edhe erëra të fuqishme si dhe rrebeshe lokale afatshkurtra shiu me vetëtima dhe bubullimë.
Këto reshje pritet të jenë shumë të mirëseardhura për vendin tonë pas një periudhe mjaft të gjatë të thatësisë së madhe./MeteoBallkan
