Nesër në Kosovë na pret mot i ngrohtë pranveror, me rreze të shumta diellore dhe vranësira të shtresave të larta herë pas here. Temperaturat pritet të lëvizin nga 4 deri në 24 gradë Celsius.
Në Shqipëri dhe tërë rajonin tonë nesër pritet të mbajë mot i ngrohtë pranveror. Priten rreze të shumta diellore dhe vranësira të nivelit të lartë atmosferik vende-vende. Temperaturat pritet të arrijnë deri në 25 gradë Celsius.
Të shtunën pritet të kemi ndryshim gradual të motit. Fillimisht do të fillojnë të fryjnë erëra nga veriu dhe verilindja dhe njëkohësisht pritet të ketë shtim gradual të vranësirave. Erërat dhe vranësirat në mbrëmje do të intensifikohen duke kushtëzuar edhe reshje lokale shiu. Në viset malore reshje bore.
Të dielën na pret mot vjeshtor, madje në disa rajone edhe dimëror. Priten reshje shiu, ndërsa në viset kodrinore-malore edhe reshje bore. Ka gjasa që reshje shqote e bore të ketë edhe në disa rajone më të ulëta në Kosovë. Temperaturat shënojnë ulje të ndjeshme.
Nga e hëna na pret mot i paqëndrueshëm dhe i ftohtë. Priten intervale të shkurtra kohore me diell në disa rajone, por gjithashtu priten vranësira të shpeshta dhe reshje lokale shiu e bore në viset kodrinore-malore. Reshjet e borës mund të paraqiten nganjëherë edhe në disa vise më të ulëta mbidetare./MeteoBallkan
