Cikloni i cili shkaktojë stuhi jashtëzakonisht të fuqishme në Itali dhe Adriatikun verior pritet të shtrijë ndikimin e tij edhe në Ballkan dhe normalisht edhe në rajonin tonë. Pasiqë jemi nën ndikimin e temperaturave mjaft të larta me origjinë nga Afrika Veriore, ardhja e frontit të ftohtë në kuadër të ketij cikloni dhe kontakti me ajrin e nxehtë që aktualisht po qëndron te ne pritet të shkaktojë reagim të bujshëm të atmosferës.
Si pasojë priten zhvillime të fuqishme konvektive ditëve të ardhshme me shtrëngata lokale me mundësi për breshër, erëra (kalimthi) të fuqishme dhe rrebeshe mjaft intensive. Normalisht nuk priten stuhi të përmasave sikur në Itali dhe Korsikë, por në këto raste atmosfera mund të reagojë “dhunshëm” dhe kjo nuk duhet nënvlerësuar.
Stuhi të fuqishme priten në gati tërë Ballkanin duke filluar nga Sllovenia, Kroacia, Bosnja dhe Hercegovina, Serbia, Mali i Zi, Kosova, Shqipëria, Maqedonia Veriore dhe Greqia. Stuhitë pritet të jenë shumë më të shpeshta në zonat kontinentale dhe më të rralla në zonat bregdetare, por edhe në zonat bregdetare priten nganjëherë stuhi dhe rrebeshe shiu.
Masat e fuqishme ciklonike do të mbesin prezente në rajonin tonë për disa me radhë dhe për këtë arsye nga e shtuna pritet të kemi mot mjaft të paqëndrueshëm dhe të ndryshueshëm ku përpos intervale kohore me diell, shpeshherë priten zhvillime të fuqishme të vranësirave të shiut të cilat herë pas here do të sjellin rrebeshe të fuqishme shiu me vetëtima dhe bubullimë.
Më shumë intervale kohore me diell priten në bregdet, prandaj edhe pse nën ndikimin e ciklonit atje mund të shijohen momente pushimi, por gjithsesi priten ulje të temperaturave dhe ato maksimale pritet të arrijnë deri rreth 30 gradë Celsius. Në zonat kontinentale priten ulje më të theksuara të temperaturave dhe rrebeshe më të shpeshta shiu./MeteoBallkan
