Sot në Kosovë dhe tërë rajonin tonë pritet të kemi mot kryesisht stabil, me diell dhe zhvillime të disa vranësirave lokale të cilat vetëm në disa zona krejtësisht të izoluara mund të kushtëzojnë ndonjë rigë ose rrebesh afatshkurtër shiu me vetëtima dhe bubullimë. Temperaturat pritet të shënojnë rritje të mëtutjeshme dhe ato maksimale pritet të arrijnë deri në 30 gradë Celsius në zonat kontinentale dhe deri në 32 gradë Celsius në zonat mesdhetare afër zonave bregdetare.
Mot kryesisht stabil dhe i nxehtë pritet edhe ditëve të ardhshme, me shumë intervale të gjata kohore me diell dhe temperatura maksimale deri 30 gradë Celsius.
Të premtën pasdite në veri dhe veriperëndim të Shqipërisë priten vranësira të cilat pritet të kushtëzojnë rrebeshe lokale shiu me vetëtima dhe bubullimë. Natën mes së premtës dhe së shtunën në Mal të Zi priten rrebeshe të fuqishme shiu me vetëtima dhe bubullimë duke përfshirë edhe bregdetin.
Për fundjavë vazhdon të jetë ngrohtë. Priten alternime mes vranësirave dhe intervaleve të gjata kohore me diell. Vende-vende mund të ketë rrebeshe të izoluara shiu me vetëtima dhe bubullimë më të theksuara të dielën në territorin e Kosovës./MeteoBallkan
