Ballkani është i mbuluar me vranësira që vijnë nga Mesdheu si pasojë e ndikimit të ciklonit gjenovian. Porcione reshjesh mjaft të dendura të shiut përfshinë veriun e Shqipërisë dhe rajonin e Dukagjinit duke shkaktuar përmbytje të mëdha lokale si në Tropojë, Gjakovë, Rahovec etj.
Sot gjatë ditës do të jemi nën ndikimin e fortë të këtij cikloni i cili pritet të sjellë porcione të reja reshjesh të dendura dhe stuhi lokale me vetëtima dhe bubullimë. Në orët e natës cikloni pritet të largohet drejt lindjes së Evropës e në territoret tona depërton fronti i ftohtë nga veriu duke ulur temperaturat me reshje të reja kalimtare shiu dhe erëra më të ftohta veriore. Temperaturat do të shënojnë ulje të ndjeshme dhe në bjeshkët e larta mund të paraqiten fjollat e para të dëborës për këtë sezonë.
E Diela na sjellë vranësira të dendura në mëngjes dhe temperatura të ulëta, ndërsa gjatë ditës priten kthjellime dhe intervale të gjata kohore me diell./MeteoBallkan
