Cikloni nga Italia po afrohet gjithnjë e më shumë duke kushtëzuar shtim të vranësirave dhe reshje shiu. Reshjet e shiut pritet të fillojnë sonte sporadikisht në veri të Shqipërisë dhe disa vise të Kosovës, për tu intensifikuar gjatë natës në disa rajone, ndërsa gjatë ditës së nesërme në pothuajse tërë territorin e Republikës së Kosovës dhe Shqipërisë.
Vende-vende, herë pas here priten reshje të dendura të shoqëruara edhe me rrebeshe lokale të fuqishme me vetëtima dhe bubullimë, sidomos në Shqipëri, por duke mos përjashtuar edhe disa vise të Kosovës.
Reshjet më të rrëmbyeshme priten në Mal të Zi dhe Shqipëri ku priten edhe përmbytje lokale, por edhe në Kosovë nuk përjashtohet mundësia për vërshime lokale. Reshje shiu dhe rrebeshe priten edhe në Kosovën lindore dhe Maqedoninë Veriore.
Erërat jugore e jugperëndimore herë pas here pritet të fuqizohen. Në Kosovë gjatë ditës së hënë do të fryjnë erëra nga juglindja, ndërsa nga e marta përsëri nga jugperëndimi vende-vende, herë pas here të fuqishme.
Reshjet e herëpashershme të shiut do të vazhdojnë edhe nga e marta, por me ndërprerje dhe më të lokalizuara e në formë të rrebeshe lokale me vetëtima dhe bubullimë./MeteoBallkan
