Pas vales së madhe të reshjeve mjaft intensive të cilat shkaktuan edhe dëme të jashtëzakonshme materiale në Kosovë, tani kemi depërtimin e masave pak më të ftohta ajrore me origjinë polare, ndërsa nën ndikimin anticiklonik reshjet janë pakësuar dukshëm.
Rrymimet ajrore kanë ndryshuar dhe tani do të kemi masa më të ftohta ajrore nga veriu e verilindja. Reshjet do të paraqiten ende në zona të lokalizuara dhe kryesisht të pakta dhe tani e tutje ato do të jenë në formë dëbore, përpos zonave më të ulëta ku ende në disa vise priten riga sporadike shiu.
Ciklonet e fuqishme që shkaktuan reshje të mëdha tanimë janë plotësuar dhe dobësuar, ndërsa një ciklon tjetër pritet të formohet në brigjet e Afrikes Veriore dhe të fuqizohet në Detin Jon.
Ky ciklon do të rrugëtojë në rrugën e tij natyrale drejtë Greqisë duke tërhequr edhe më shumë temperaturat e ulëta dhe rrymimet e ftohta ajrore nga veriu drejt territoreve tona. Për këtë arsye nga e enjta priten reshje të herëpashershme bore në Kosovë. Reshje paksa më intensive bore dhe atmosferë e vërtetë dimërore do të jetë në viset kodrinore-malore, por edhe shumë ultësira të Kosovës dhe Maqedonisë së Veriut pritet të kenë reshje bore edhe pse sipac ecurive aktuale sinoptike nuk priten reshje të mëdha bore./MeteoBallkan
