Temperaturat shumë të larta me origjinë nga Afrika veriore dhe depërtimi i fronteve nga Oqeani Atlantik janë kushte ideale për krijimin e stuhive të fuqishme në zonat ku këto masa ajrore kanë kontakt.
Një masë e re ajrore jo-stabile nga Atlantiku përmes Francës sot depërton në Evropë duke arritur deri në veri të Ballkanit. Stuhi të reja priten që nga Franca, Gjermania, Austria, Çekia, Sllovakia, Zvicra, Polonia etj.
Stuhitë më të forta dhe potencialisht të dëmshme sonte priten në veri të Italisë ku sipas disa parametrave do të ketë shanse për breshër të rrezikshëm dhe potencialisht edhe tornado.
Vonë në mbrëmje disa nga këto stuhi depërtojnë edhe në Slloveni. E marta sjellë kushte mjaft të vështira me mot shumë jo-stabil në Slloveni, pjesë të Kroacisë, Bosnjë e më vonë deri në Serbi.
Territoret tona do të jenë nën ndikimin e masave kryesisht stabile dhe shumë të nxehta ajrore deri të mërkurën.
Të mërkurën vonë dhe të enjten destabilizim i motit pritet edhe në Kosovë dhe më gjerë ku do të kemi stuhi lokale kalimtare dhe ulje të ndjeshme të temperaturave./METEOBALLKAN
