Anticikloni stabil po vazhdon të dominojë kushtet e motit në territoret tona këto ditë duke “dhuruar” mot krejtësisht stabil dhe pothuajse pranveror këto ditë të fundit të këtij viti.
Në fund të vitit do të vazhdojë dominimi anticiklonik, përkundër lajmërimit në raportin javor të motit se mund të kemi riga shiu e fjolla bore, kjo shumë vështirë që mund të ndodhë. Për fjolla bore as që bëhet fjalë, ndërsa disa riga shiu mund të ndodhin në disa vise të Shqipërisë dhe Mali të Zi. Në Kosovë dita e fundit me intervale të gjata kohore me diell dhe temperatura maksimale nga 8 deri në 12 gradë Celsius. Në mbrëmje vonë pak më ftohtë, por pa acar ose me acar të dobët vetëm në disa zona. Erërat nga jugu dhe jugperëndimi do të vijnë duke u fuqizuar gradualisht.
Anticikloni do të fillojë të dobësohet dhe masa ajrore nga Atlantiku do të fillojnë të afrohen duke shtuar vranësira, por mbetet ende mjaft ngrohtë për këtë periudhë kohore.
Pak më shumë vranësira priten në Shqipëri dhe Mal të Zi e më pak vranësira parashihen në Maqedoninë Veriore dhe Luginën e Preshevës. Nën ndikimin e masave të ngrohta ajrore nga Mesdheu në tërë rajonin tonë do të jetë ngrohtë për këtë periudhë kohore. Nëpër disa lugina normalisht që do të ketë mjegull.
Edhe dy -tri ditët e para të vitit të ri 2024 do të vazhdojë mot i ngrohtë për këtë periudhë kohore, ndërkohë që vranësirat mund të fillojnë të shohen duke sjellur edhe ndonjë reshje lokale. Rrymimet ajrore do të vazhdojnë të jenë nga jugu dhe jugperëndimi.
Edhe një Vit i Ri pa borë ose ndonjë atmosferë dimërore. Për dimër të vërtetë duhet të presim tre muajt kryesor të dimrit./MeteoBallkan
