Për Natën e fundit të këtij viti nuk kemi çka të flasim, ngase kemi fol shumë herë. Ndryshimi i motit fillon në fillim të muajit të ri apo në fillim të vitit të ri kur masa ajrore nga Atlantiku depërtojnë thellë në viset tona duke sjellur vranësira më të shumta dhe reshje të herëpashershme shiu.
Anticikloni i Azoreve do të dobësohet përsëri mbi territoret tona por mbesin ende aktive masat ajrore mjaft të ngrohta për këtë periudhë kohore që tani vijnë kryesisht nga Atlantiku e nganjëherë edhe nga Mesdheu e Afrika Veriore.
Pra, Janari fillon me mot dinamik, por të ngrohtë. Reshjet e shiut do të fillojnë në fillim të muajit dhe do të jenë të herëpashershme, ndërsa reshje bore vetëm në zonat më të larta malore.
Ndryshimi i mirëfilltë i sinoptikes do të fillojë diku afër dates 6 Janar me një ciklon më të thellë që vjen nga Atlantiku. Me kalimin e ciklonit në lindje në territoret tona do të vendosen rrymime ajrore më të ftohta nga veriu dhe për pasojë mund të kemi edhe reshje bore.
Edhe më interesante mbetet gjendja diku rreth dates 8 ose 9 Janar me krijimin një super-cikloni diku në veri të Italisë që eventualisht mund të shkaktojë reshje të dendura bore në shumë vende të Evropes perëndimore e qendrore. Ky ciklon pastaj do të zhvendosej gradualisht edhe në Ballkan, ndërsa në kombinim me masat e ftohta ajrore polare më në fund mund të shijojmë atmosferë dimri, megjithatë të gjithë e dimë se parashikimet afatgjata duhet të analizohen mire dhe të merren me pak rezerva, ngase ndryshime do të ketë.
Gjithsesi shumica e modeleve japin një version dimëror dhe atë në stil mjaft të ashpër, por ju lutemi që këto informacione të mos merren krejtësisht të sigurta, ngase ndryshime në parashikim presim në përditësimet e vazhdueshme të modeleve globale, numerike-kompjuterike për parashikim të motit.
Ky parashikim afatgjatë bazohet në ecuritë aktuale sinoptike që janë shumë interesante, ndërsa ne do të jemi duke e përcjellur gjendjen sinoptike dhe presim ndryshime të cilat shpresojmë të mos na zhgënjejnë në masë të madhe./MeteoBallkan
