Shirat e rrëmbyeshëm po i vështirësojnë përpjekjet për tu ardhur në ndihmë komuniteteve në ishujt e largët perëndimorë të Indonezisë të cilat u goditën nga cunami masiv javën e kaluar që shkaktoi vdekjen e 429 personave.
Shirat i kanë bërë rrugët të pakalueshme duke penguar autokolonat me makineri të rënda e furnizime për zonat e izoluara. Autoritetet janë detyruar të dërgojnë helikopterë për dërgimin e ndihmave dhe evakuimin e banorëve.
Mendohet se tsunami i së shtunës, i cili goditi bregun perëndimor të ishullit Java dhe pjesën jugore të Sumatrës, u shkaktua nga një rrëshqitje nënujrore masive që pasoi shpërthimin e vullkanit Anak Krakatoa mes dy ishujve.
Si pasojë rreth 1.500 persona u plagosën, rreth 150 të tjerë rezultojnë të humbur. Me mijëra vetë janë zhvendosur nga vendbanimet e tyre. Autoritetet po u bëjnë thirrje banorëve të qëndrojnë larg bregut për shkak të aktivitetit të vazhdueshëm vullkanik që rrezikon një tjetër goditje nga valë të fuqishme.
Shefi i Agjencisë Gjeologjike indoneziane Rudy Suhendar, i tha Shërbimit Indonezian të Zërit të Amerikës se po vazhdojnë hetimet rreth shkaqeve të cunamit.
Pamje kur Cunami godet njerzit në koncert:
