Nesër në Kosovë pritet të mbajë mot kryesisht me diell dhe relativisht i ngrohtë gjatë mesditës. Mëngjesi do të jetë i ftohtë dhe me temperatura që do të favorizojnë brymën. Pritet të ketë edhe mjegull gjatë mëngjesit të hershëm. Temperaturat parashihen nga -2 deri në 15 gradë Celsius.
Në Shqipëri, Maqedoninë e Veriut, Luginë të Preshevës dhe Mal të Zi nesër pritet të mbajë mot stabil dhe kryesisht me diell. Mëngjesi pritet të jetë mjaft i ftohtë dhe në disa zona me acar të fortë, ndërsa dita stabile dhe relativisht e ngrohtë.
Bërthama e ajrit të ftohtë me origjinë siberike do të fillojë të arrijë në Kosovë gjatë së dieles e sidomos të Hënën kur edhe priten fjolla sporadike bore sidomos në disa zona kodrinore-malore. Temperaturat do të shënojnë ulje veçanërisht të Hënën. Priten intervale kohore me diell dhe vranësira e reshje sporadike bore. Në ultësira kryesisht thatë, me ndonjë reshje të izoluar sporadike dhe afatshkurtër. Reshje të pakta lokale të hënën priten edhe në disa vise të Shqipërisë, Maqedonisë së Veriut dhe Luginës së Preshevës. Disa riga të dobëta shiu në ultësira e disa fjolla bore në viset kodrinore-malore. Bërthama e ajrit të ftohtë të Hënën do të jetë pikërisht në territoret tona, por siç kemi theksuar kjo masë ajrore nuk është e fuqishme për të krijuar ndonjë ndryshim dramatik të motit.
Të Martën na pret mot i ftohtë dhe me shtim gradual të vranësirave, ndërsa të mërkurën vijnë vranësira nga Mesdheu me reshje fillimisht bore në disa zona kodrinore-malore, pastaj me reshje shiu. Temperaturat do të shënojnë rritje sepse do të ketë rrymime të fuqishme ajrore nga jugu. Vetëm në fillim të reshjeve mund të ketë reshje të përziera për shkak të mbetjeve të ajrit të ftohtë./MeteoBallkan
