Dhjetori fillon si muaj tipik dimëror për zonat kodrinore-malore me reshje të dendura bore në shumë vise, ndërsa nëpër ultësira reshje janë kryesisht të shiut dhe vende-vende të përziera.
Të Dielen në Kosovë pritet të mbajë mot plotësisht i vranët dhe me reshje të shpeshta atmosferike. Nëpër zonat e ulëta kryesisht shi, ndërsa në viset kodrinore-malore borë. Në disa vise më të ulëta pasdite vonë priten reshje bore, ndërsa reshjet e dendura të borës do të vazhdojnë në shumë vise kodrinore-malore sidomos në zonat afër Maqedonisë së Veriut dhe Shqipërisë.
Në Shqipëri, Maqedoninë Veriore, Luginë të Preshevës dhe Mal të Zi nesër pritet të mbajë mot i vranët dhe me reshje shiu e bore. Reshje të dendura do të ketë në Maqedoninë Veriore, nëpër ultësira shi e në viset kodrinore-malore bore. Reshjet do të vazhdojnë edhe në shumë pjesë të Shqipërisë. Shtresat e borës do të shtohen në viset kodrinore-malore. Në mbrëmje vonë ose gjatë natës reshjet do të dobësohen dhe do të fillojë përmirësimi gradual i motit, megjithatë edhe të hënën priten reshje të pakta të izoluara.
Nga e Hëna na pret mot me vranësira, ndërsa do të paraqiten edhe intervalet kohore me diell të cilat do të vijnë duke u shpeshtuar. Temperaturat do të jenë rreth vlerave mesatare për këtë periudhë kohore ose pak më të larta, ngase pritet të ketë rritje graduale të tyre./MeteoBallkan
