Gjatë kësaj jave në rajonin tonë do të ketë koncentrime të larta të pluhurin që vjen nga shkretëtirat e Afrikës veriore dhe këtë e favorizon gjendja e përgjithshme sinoptike dhe qarkullimi i fuqishëm i masave ajrore që vjen nga jugu dhe perëndimi.
Presioni i ulët atmosferik (masa ciklonike) do të jetë i përqendruar gjatë në Mesdheun perëndim dhe Itali duke sjellur atje stuhi të fuqishme shiu, ndërsa presioni i lartë (anticikloni) thellë në lindje të Kontinentit dhe jug të Rusisë. Si pasojë e afrimit të këtyre masave jo stabile nga Mesdheu perëndimor dhe Italia do të kemi rrymime të fuqishme ajrore nga jugu, jugperëndimi dhe juglindja dhe për këtë arsye masa ajrore e përzier me pluhurin e shkretëtirave të Afrikës do të jetë e pranishme gjatë gati tërë javës në atmosferën mbi rajonin tonë.
Këto masa ajrore sjellin edhe reshje të herëpashershme, lokale shiu, por reshjet në viset tona nuk do të jenë të forta sikur në Itali dhe shumë pjesë tjera të Evropes.
Temperaturat kanë shënuar rritje krahasuar me ditët e kaluara si rezultat e këtyre rrymimeve ajrore që i përmendem më lartë, megjithatë vranësirat e shumta pengojnë rritjen e madhe të temperaturave.
Të Mërkurën dhe të Enjten pritet të kemi më shumë rreze diellore dhe temperaturat do të shënojnë rritje të mëtutjeshme, në Kosovë deri në 25 gradë Celsius, ndërsa në Shqipëri dhe Maqedoninë Veriore edhe më ngrohtë.
Mundësi për reshje më intensive (kalimtare) të Enjten vonë dhe të Premten herët
Gjatë tërë javës do të ketë reshje, por të pakta dhe të karakterit lokal. Reshje dukshëm më intensive pritet të ketë Të Enjten vonë dhe të Premten herët kur një sistem i fuqishëm kalimtar me rrebeshe shiu mund të përfshijë Shqipërinë dhe pastaj edhe pjesë të Kosovës dhe Maqedonisë së Veriut.
Ka gjasa që nga e Premtja apo fundjava do të ketë pastrim të atmosferës nga pluhuri Saharian por kjo mbetet ende të shihet.
Fundjava vjen me intervale kohore me diell dhe vranësira lokale. Temperaturat mund të shënojnë ulje kryesisht të lehta, ndërsa nuk përjashtohet mundësia për reshje kryesisht të pakta lokale.
Pra, një javë dukshëm më e ngrohtë para nesh, me vranësira të shpeshta, por edhe me intervale të gjata kohore me diell. Reshjet lokale nuk do të mungojnë por jo në të gjitha viset, ndërkaq pluhuri Saharian do të jetë me ne pothuajse gjatë tërë javës.
Ndryshime të vogla në parashikim gjithsesi se mund të ketë dhe për çdo ndryshim evnetual mund të na ndiqni në postimet tona të përditshme në mbrëmje vonë dhe në mëngjes./MeteoBallkan
