Disa zhvillime të fuqishme konvektive apo vertikale pritet të ndodhin sot në disa pjesë të territorit të Republikës së Kosovës, pastaj në shumë pjesë të Maqedonisë së Veriut, Luginës së Preshevës dhe Shqipërisë.
Këto zhvillime do të jenë tipike verore të karakterit lokal, pra nuk kapin shumë territor dhe më shumë përfshijnë viset kodrinore-malore.
Në Shqipëri zhvillime priten në juglindje, lindje dhe lokalisht edhe në verilindje të vendit dhe normalisht më shumë do të ketë në viset kodrinore-malore. Në Maqedoninë Veriore zhvillime të izoluara priten në shumë pjesë të territorit si dhe në Luginën e Preshevës.
Në Kosovë më shumë gjasa për zhvillime ka në jug dhe lindje të vendit, por lokalisht edhe në pjesët qendrore dhe verilindore. Të gjitha këto zhvillime pritet të jenë të izoluara, por mund të ndodh ndonjë stuhi e fuqishme me rrebeshe intensive, vetëtima dhe bubullima dhe breshër.
Në viset tjera nuk parashihen zhvillime, por gjithmonë në këto raste mund të ndodhin befasi sepse as modelet nuk mund të jenë plotësisht të sakta se ku mund të krijohen kushte për ndonjë stuhi të izoluar.
Pas një dite mjaft të nxehtë, pasdite dhe në mbrëmje presim destabilizim të fuqishëm të atmosferës, vende-vende me bubullima, vetëtima, rrebeshe të izoluara dhe mundësi për breshër. Më shumë probabilitet kanë zonat që i cekëm më lartë.
Dy ditët e ardhshme do të vazhdojë vapa verore, me gjasa për zhvillime të izoluara më shumë në disa pjesë të Maqedonisë së Veriut, ndërsa kulminacioni i të nxehtit do të jetë të dielen./MeteoBallkan
