Një front i dobësuar i ftohtë ajror do të ndryshojë dinamikat e motit duke filluar ditën e nesërme (E Martë), ku pritet që në disa rajone të ketë destabilizim të fuqishëm të atmosferës me shtim të konsiderueshëm të vranësirave, zhvillim të fuqishëm të tyre duke kushtëzuar rrebeshe lokale shiu me vetëtima, bubullimë dhe mundësi për breshër.
Fronti do të jetë i dobët, por në disa raste mjafton një “shkëndijë” e ajrit jo-stabil për destabilizim të atmosferës.
Dita e Martë do të jetë e nxehtë, por në shumë zona vranësirat do të marrin karakter zhvillimi duke gjeneruar stuhi të izoluara shiu me vetëtima, bubullimë dhe mundësi për breshër.
Mund të ndodhë edhe krijimi i ndonjë shtrëngate të fuqishme me erëra të fuqishme dhe shkarkesa intensive atmosferike. Shiu nuk do të jetë gjithëpërfshirës dhe do të jetë tipik veror ku disa zona përfitojnë dhe zona tjera nuk përfitojnë. Varësisht nga vendi ku reja e stuhisë krijohet dhe pastaj zgjerohet dhe zhvillohet.
Temperaturat normalisht do të shënojnë ulje në kohën e zhvillimit të vranësirave.
Rrebeshe shiu priten në shumë rajone të Kosovës, pastaj në disa pjesë të Shqipërisë kontinentale, pjesë të Maqedonisë së Veriut, Luginës dhe veriut të Malit të Zi.
Në viset bregdetare nuk priten zhvillime me ndonjë përjashtim të vogël. Zhvillimet nga ky sistem eventual do të jenë më të forta normalisht në zonat kodrinore-malore.
Temperaturat do të rriten menjëherë të Mërkurën me mundësi të pakta për ndonjë reshje të pakët.
Mundësi për reshje paksa më intensive të Premten
Një fronti i ri i ftohtë ajror mund të arrijë të Enjten me reshje lokale shiu e rrebeshe lokale me vetëtima dhe bubullimë. Reshje më intensive shiu mund të ketë ditën e Premte sipas disa parashikimeve dhe mund të përfshijnë shumë rajone në Kosovë dhe pak më gjerë, megjithatë situata është në evoluim e sipër dhe për këtë duhet ende të presim për të qenë më të sigurt.
Informacione tjera në postimin e ardhshëm në detajet kryesore për motin javor./MeteoBallkan
