Një eklips i plotë Hënor do të jetë i dukshëm në qiellin e Evropës të hënën në mëngjes. Ky do të jetë eklipsi i fundit hënor total deri në vitin 2021.
Më 21 janar 2019 pritet të shfaqet në qiell “Super hëna e përgjakur”. Eklipsi i Hënës do të jetë i dukshëm në në orët e para të mëngjesit të 21 janarit. Eklipsi i Hënës do të jetë i pari për këtë vit.
Super hëna merr emrin pasi hëna e plotë e re, përkon me pikën më të afërt të Tokës në orbitën e saj mujore. Gjatë këtij eklipsi, hëna, sateliti i vetëm natyror që ka Toka, ndryshon nga e argjendtë në të kuqerremtë, për shkak të bllokimit të dritës së diellit nga hija e tokës, kur Toka kalon mes Diellit dhe Hënës.
Gjithsej ky eklips do të zgjasë 64 minuta. Kushtet më të mira për ta parë këtë fenomen më mënyrë sa më të qartë do t’i ketë Evropa Perëndimore (Britania, Islanda, Irlanda, Skandinavia, Ishujt Kanarie) kurse kushtet më të dobëta për një fenomen të tillë do t’i ketë Evropa Juglindore.
Fenomeni në Tiranë do të ndodh nga ora 03:30 deri 06:30 të mëngjesit të 21 janarit kur hëna do të zhduket në horizont në drejtimin perëndimor. Njëjtë pritet të jetë edhe në Kosovë.
Ndaj edhe këtë vit me sytë nga qielli për një spektakël. Ky fenomen ndodhi edhe vitin e kaluar.
