Sot në Kosovë pritet të mbajë mot me diell dhe jashtëzakonisht i nxehtë. Temperaturat do të arrijnë kulminacionin duke prekur shifrën 40 në shumë rajone. Sipas disa modeleve që shkojnë pak në ekstrem në disa zona maksimalja mund të arrijë deri në 43 gradë Celsius sipas standardeve meteorologjike nën hije.
Pasdite në disa vise kryesisht kodrinore-malore pritet që të zhvillohen vranësira që do të kushtëzojnë rrebeshe të izoluara shiu me vetëtima dhe bubullimë.
Në Shqipëri, Maqedoninë Veriore, Luginë të Preshevës dhe Mal të Zi të Shtunën pritet të mbajë mot kryesisht me diell dhe me vapë intensive verore. Temperaturat në shumë zona do të arrijnë dhe tejkalojnë mbi 40 gradë Celsius. Pasdite disa zona malore pritet të kenë rrebeshe të izoluara shiu me vetëtima dhe bubullimë.
Gjatë natës dhe mëngjesit të së dieles në Mal të Zi dhe veri të Shqipërisë priten zhvillime të stuhive lokale të shiut me vetëtima dhe bubullimë. Disa nga këto do të zhvillohen edhe në territorin e Kosovës mëngjesin e së dieles.
Të Dielën temperaturat shënojnë ulje dhe priten rrebeshe lokale shiu me vetëtima dhe bubullimë. Rrebeshet nuk do të zgjasin shumë dhe nuk të kapin të gjitha viset.
Fillimi i javës së re me mot më të këndshëm në aspektin termik. E Hëna me rrebeshe lokale shiu në Mal të Zi dhe lokalisht edhe në Kosovë, ndërsa të Martën reshje dhe rrebeshe shiu në gati të gjitha viset si dhe ulje më të ndjeshme të temperaturave./MeteoBallkan
