Pas një nate dhe mëngjesi mjaft të ftohtë, në tërë rajonin tonë nesër gjatë ditës pritet ngritje graduale e temperaturave. Nesër pra, do të kemi mot të thatë të vranët, me mundësi për mjegull nëpër lugina dhe gjithashtu me mundësi për intervale kohore me diell. Kjo vlenë për tërë rajonin.
Të hënën në Detin Adriatik do të kemi krijimin e një cikloni të ri i cili Shqipërisë do ti sjellë reshje të dendura shiu. Vetëm në viset malore të pjesëve lindore, juglindore dhe veriore priten reshje bore. Në orët e mbrëmjes reshje të dendura do të përfshijnë edhe perëndimin, veriperëndimin dhe jugperëndimin e Kosovës dhe varësisht nga temperaturat ato do të jenë në formë shiu ose bore. Në viset kodrinore-malore të këtyre viseve priten reshje të reja bore. Në viset tjera të Kosovës priten reshje më të pakta. Vende-vende priten reshje shiu, reshje të përziera apo reshje bore. Eshtë shumë vështirë të përcaktohet, sepse do kemi depërtimin e masave ajrore pak më të nxehta nga Mesdheu të cilat masa ajrore do të përzihen me masat ajrore polare të cilat aktualisht mbizotërojnë mbi rajonin tonë. Në fund temperaturat polare do të tërhiqën dhe mbi rajonin tonë do të mbizotërojnë temperatura relativisht të nxehta me origjinë nga Atlantiku, Mesdheu dhe Afrika Veriore.
Reshje të relativisht të dendura në orët e mbrëmjes do të përfshijnë edhe perëndimin e Maqedonisë ku priten reshje shiu nëpër ultësira dhe reshje bore në viset malore.
Edhe ditëve të ardhshme do të kemi mot mjaft të ndryshueshëm me reshje të shpeshta shiu në Shqipëri, dhe reshje të përziera, herë pas here edhe në Kosovë dhe Maqedoni. Do të kemi edhe periudha kohore pa reshje atmosferike./Meteoballkan
