Sot në Kosovë pritet të mbajë mot i ngrohtë, me diell dhe vranësira lokale të cilat rrallë në disa rajone kryesisht kodrinore-malore do të kushtëzojnë rrebeshe të izoluara shiu.
Temperaturat do të lëvizin nga 5 minimalja deri në 25 gradë Celsius ajo maksimale.
Në Shqipëri, Maqedoninë Veriore, Luginë të Preshevës dhe Mal të Zi pritet të mbajë mot me diell dhe vranësira lokale. Në disa lokacione priten riga shiu ose rrebeshe të izoluara shiu me ndonjë vetëtimë dhe bubullimë. Do të jetë mjaft ngrohtë.
Edhe e mërkura pritet të jetë e ngrohtë, përpos Kosovës ku orëve të pasdites dhe mbrëmjes temperaturat do të shënojnë ulje dhe ndryshimi i motit do të shoqërohet edhe me rrebeshe lokale shiu. Rrebeshe lokale shiu priten edhe në veri të Malit të Zi, Maqedoninë Veriore dhe Luginë të Preshevës.
Të enjten fronti i fuqishëm i ftohtë ajror shkakton reshje shiu e ulje të temperaturave. Në viset kodrinore-malore do të paraqiten edhe reshje bore. Në mbrëmje kthjellim i motit, por jo i tërësishëm. Mëngjesi i së premtes mund të sjellë ngrica të dobëta në disa vise të Kosovës dhe viset malore të rajonit. Dita vijon me vranësira, intervale kohore me diell e riga lokale shiu. Në viset malore ndonjë fjollë bore. Në perëndim të Shqipërisë më ngrohtë./MeteoBallkan/
