Një aeroplan zyrtar nga Katari ka realizuar një ulje spektakolare në aeroportin e Bernës, në Zvicër, pasi është përballur me erëra të fuqishme anësore gjatë afrimit drejt pistës.
Ngjarja ndodhi më 17 nëntor 2026, në aeroportin Bern-Belp, ku një aeroplan i tipit Airbus A320, i nisur nga Doha, po transportonte pjesëtarë të një delegacioni qeveritar të Katarit.
Pamjet e publikuara në rrjetet sociale tregojnë momentet dramatike kur aeroplani lëkundet dhe anohet dukshëm gjatë zbritjes, duke krijuar përshtypjen se po e kishte të vështirë të ruante drejtimin për shkak të erërave të forta.
Sipas raportimeve, erërat kanë arritur deri në 65 kilometra në orë, duke vështirësuar ndjeshëm manovrimin e aeroplanit në momentet e fundit para prekjes së pistës.
Për të përballuar erërat anësore, pilotët përdorën një teknikë të njohur në aviacion si Crab Approach. Kjo manovër konsiston në afrimin e aeroplanit në një kënd të caktuar kundrejt drejtimit të erës, në mënyrë që të ruhet trajektorja drejt pistës dhe të korrigjohet pozicioni para uljes.
Aeroplani transportonte një pjesë të delegacionit të Katarit në kuadër të vizitës zyrtare të emirit të Katarit në Zvicër. Megjithatë, emiri Sheikh Tamim bin Hamad Al Thani nuk ndodhej në këtë aeroplan, pasi kishte udhëtuar me një avion tjetër.














