Nesër në Kosovë pritet të mbajë mot me diell dhe temperaturat do të shënojnë rritje edhe pse mëngjesi do të jetë mjaft i freskët.
Temperaturat minimale parashihet të zbres në 5 gradë Celsius, kurse maksimale pritet të arrijë deri në 27 gradë Celsius.
Në Shqipëri, Maqedoninë Veriore, Luginë të Preshevës dhe Mal të Zi nesër pritet të mbajë mot me diell dhe me rritje të temperaturave në të gjitha viset. Do të ketë vranësira të shtresave të larta, por jo të theksuara.
Pasdite në jug të Shqipërisë priten rrebeshe të izoluara shiu me vetëtima dhe bubullimë.
Të dielën një gradë ose dy më ngrohtë, megjithatë me zhvillime lokale të vranësirave pasdite parashihet që të ketë rrebeshe të izoluara shiu me vetëtima dhe bubullimë në shumë pjesë të Kosovës, perëndim të Maqedonisë së Veriut, lindje, verilindje dhe juglindje të Shqipërisë dhe veri të Malit të Zi ku priten rrebeshe më intensive.
Në përgjithësi zhvillimet konvektive do të jenë të izoluara, por disa rajone mund të përfshihen nga rrebeshe intensive me mundësi edhe për breshër.
Stuhi shiu me bubullima dhe breshër priten edhe të hënën pasdite sidomos në veri e verilindje të Kosovës deri në pjesët qendrore, veri të Malit të Zi dhe pjesë të Maqedonisë së Veriut.
