Nesër në Kosovë pritet të mbajë mot me diell dhe i nxehtë, por pasdite pritet të ketë shtim lokal të vranësirave dhe zhvillime të fuqishme konvektive dhe si pasojë priten rrebeshe lokale shiu me vetëtima, bubullimë dhe mundësi edhe për breshër. Në disa zona mund të ketë shtrëngata të fuqishme kalimtare me reshje intensive brenda një periudhe të shkurtër kohore, por në disa zona tjera nuk priten fare reshje.
Temperaturat pritet të lëvizin nga 13 minimalja deri në 32 gradë Celsius ajo maksimale, për tu freskuar në zonat e rrebesheve lokale të shiut.
Në Shqipëri dhe rajon nesër pritet të mbajë mot me diell dhe i nxehtë veror. Pasdite kryesisht në zona kodrinore-malore priten zhvillime të konvektive dhe stuhi të izoluara shiu me vetëtima, bubullimë dhe mundësi për breshër.
Mjaft jo stabile pritet të jetë dita e hënë ku nga mesdita apo orëve të pasditës do të ketë destabilizim të fuqishëm të atmosferës me zhvillime të fuqishme konvektive priten rrebeshe lokale shiu me vetëtima, bubullimë dhe mundësi për breshër. Vende-vende priten shtrëngata të fuqishme lokale. Freskim në zonat me reshje e vranësira, përndryshe mbetet nxehtë.
Edhe të martën e të mërkurën pritet të kemi mot të paqëndrueshëm, me periudha me diell dhe zhvillime të rrebesheve lokale të shiut me vetëtima dhe bubullimë./MeteoBallkan
