Nesër në Kosovë pritet të mbajë mot kryesisht me diell dhe mjaft i nxehtë veror. Temperaturat do të shënojnë rritje të ndjeshme, ndërsa pasdite pritet të ketë shtim lokal të vranësirave e më vonë edhe ndonjë rrebesh lokal shiu me vetëtima dhe bubullimë kryesisht në veriperëndim, veri dhe verilindje të vendit.
Temperaturat minimale pritet të zbresin deri në 14 gradë Celsius, kurse maskimalja pritet të arrijë deri në 33 gradë Celsius.
Në Shqipëri, Maqedoninë Veriore, Luginë të Preshevës dhe Mal të Zi nesër pritet të mbajë mot kryesisht me diell dhe shumë i nxehtë veror. Pasdite vonë vetëm në veri të Malit të Zi priten rrebeshe lokale shiu me vetëtima dhe bubullimë.
Të dielën destabilizim i fuqishëm i atmosferës, me shtim dhe grumbullim të vranësirave konvektive të cilat së pari në Kosovë do të kushtëzojnë rrebeshe lokale shiu me vetëtima, bubullimë dhe mundësi për breshër. Pastaj, zhvillime konvektive priten edhe në verilindje të Shqipërisë, Mal të Zi dhe shumë vise në Maqedoninë Veriore e Luginë të Preshevës. Në viset tjera të Shqipërisë priten zhvillime të ndonjë stuhie por në zona më të izoluara.
Temperaturat do të shënojnë ulje të ndjeshme, përpos pjesëve të Shqipërisë ku ulja e temperaturave do të ndjehet fare pak.
Nga e hëna stabilizim i motit. Fillimisht do jetë pak freskët, megjithatë temperaturat do të kenë tendencë rritjeje progresive./MeteoBallkan
