Edhe një javë mjaft e nxehtë verore ashtu si i ka hije Gushtit. Frontet e ftohta ajrore janë shumë larg viseve tona, megjithatë një front tërësisht i dobësuar i ftohtë ajror do të arrijë që të depërtojë lehtë dhe të krijojë disa kushte për ndonjë rrebesh të izoluar shiu në Kosovë e pak më shumë në jug=lindje të Shqipërisë dhe pjesë të Maqedonisë së Veriut.
Java filloi shumë e nxehtë si në Kosovë e veçanërisht në Shqipëri.
Vapa verore kulmoi të martën në Kosovë sepse të mërkurën do të ketë ulje krejtësisht të lehta dhe pothuajse të papërfillshme të temperaturave. Në disa lokacione priten rrebeshe afatshkurtra shiu me vetëtima dhe bubullimë. Atmosfera do të destabilizohet më fuqishëm në disa vise të Maqedonisë së Veriut dhe në gjysmën jugore të Shqipërisë ku priten stuhi të izoluara shiu me vetëtima dhe bubullimë.
Fronti tërësisht i dobësuar i ftohtë ajror do të depërtojë të mërkurën fillimisht në Kosovë pastaj edhe në disa pjesë të rajonit dhe viseve tona.
Dita e enjte në Kosovë do të jetë pak më e freskët edhe pse me diell priten ulje paksa më të theksuara të temperaturave. Rrallë në ndonjë rajon mund të ketë ndonjë rrebesh të izoluar shiu.
Rrebeshe paksa më të forta dhe më të përhapura shiu të Enjten priten në viset kodrinore-malore të Shqipërisë dhe Maqedonisë së Veriut sidomos në jug të Shqipërisë, lokalisht edhe në lindje të vendit. Temperaturat do të shënojnë ulje në zonat me zhvillime. Vapa e fortë vazhdon në perëndim të Shqipërisë.
Masa jo-stabile ajrore do të mbetet prezente edhe të Premten në pjesë të Shqipërisë dhe Maqedonisë së Veriut e shumë më pak në Kosovë ose hiç fare. Në Kosovë mund të ndodhë ndonjë rrebesh i izoluar në rajonet afër kufirit me Maqedoninë Veriore. Rrebeshe pasdite më intensive priten në jug e lindje të Shqipërisë dhe disa pjesë të Maqedonisë së Veriut. Rrebeshe mjaft intensive të Premten pasdite mund të zhvillohen në juglindje të Shqipërisë.
Fundjava vjen me mot kryesisht me diell në Kosovë dhe i nxehtë, por jo vapë shumë e madhe. Nxehtë do të jetë edhe në Shqipëri dhe Maqedoninë Veriore, por në disa rajone do të ketë mundësi për zhvillime të izoluara konvektive.
Pra, për fund: edhe një javë e nxehtë, me ulje të temperaturave (jo shumë të theksuara) në Kosovë nga e enjtja, por pa reshje domethënëse. Reshje shumë të pakta në Kosovë potencialisht lokalisht të mërkurën pasdite. Reshje paksa më intensive në juglindje të Shqipërisë dhe zonat përreth nga enjta e tutje si dhe në disa zona të Maqedonisë së Veriut.
Fundjava vjen kryesisht stabile, por ka mundësi për zhvillime të izoluara./MeteoBallkan
