Super El Niño vazhdon të forcohet me shpejtësi në të gjithë Oqeanin Paqësor tropikal, dhe Severe Weather Europe shpjegon se si rritja e tij e shpejtë po nxitet nga një kombinim jashtëzakonisht i fortë i erërave perëndimore dhe nxehtësisë së oqeaneve,
Sipas parashikuesve të motit nga Severe Weather Europe, Super El Niño ka vazhduar të “forcohet me shpejtësi” në Paqësorin tropikal. Prej aty, ndikimi i tij në rrymat oqeanike ka bërë që, pavarësisht mijëra kilometrave larg, të rrisë temperaturat në Evropë dhe do të vazhdojë ta bëjë këtë edhe gjatë vjeshtës.
Super El Niño po forcohet me shpejtësi në Paqësorin tropikal, ndërsa ndikimi i tij mund të reflektohet gjatë vjeshtës dhe dimrit edhe në kushtet e motit në Evropë. Parashikimet më të fundit afatgjata kanë rritur sërish kulmin e pritshëm të intensitetit të tij, duke bërë që ky fenomen i vitit 2026, më vonë gjatë këtij viti, të mund të afrohet me nivelet rekord.
Sipas analizës së portalit meteorologjik Severe Weather Europe, pas forcimit të shpejtë të këtij fenomeni klimatik qëndron një kombinim jashtëzakonisht i fuqishëm i erërave perëndimore dhe sasive të mëdha të nxehtësisë së akumuluar nën sipërfaqen e oqeanit.
El Niño ndryshon qarkullimin atmosferik mbi Paqësorin tropikal, gjë që mund të ketë pasoja shumë përtej këtij rajoni. Ndryshimet e presionit dhe erërave ndikojnë në shpërndarjen e reshjeve dhe temperaturave dhe mund të formësojnë modelet e motit në pjesë të mëdha të planetit.
El Niño është pjesë e fenomenit ENSO, përkatësisht “El Niño – Lëkundja Jugore”, i cili përfshin ndryshime në temperaturën e sipërfaqes së detit dhe kushtet atmosferike mbi Paqësorin ekuatorial. ENSO alternon mes fazës së ngrohtë, El Niño, dhe fazës së ftohtë, La Niña, zakonisht në intervale prej një deri në tre vjet.
Ndërrimi i këtyre fazave ndikohet fuqishëm nga erërat pasat tropikale. Kur ngrohja e Paqësorit intensifikohet në përmasa ekstreme, flitet për Super El Niño.
Ngjarje të tilla janë të rralla dhe shfaqen afërsisht një herë në dekadë ose edhe më rrallë. Tre rastet e fundit të regjistruara ishin në vitet 2015/2016, 1997/1998 dhe 1982/1983.
Vjeshta në Evropë mund të jetë më e ngrohtë dhe më e lagësht
Sipas parashikimeve aktuale afatgjata, ndikimet e para mund të ndihen që gjatë vjeshtës.
Nga tetori deri në dhjetor, mbi pjesën më të madhe të Evropës mund të zhvillohet një sistem me presion të ulët, e shoqëruar me temperatura mbi mesataren. Në të njëjtën kohë, qarkullimi perëndimor dhe jugperëndimor nga Atlantiku mund të sjellë sasi të mëdha lagështie.
Për këtë arsye, aktualisht parashikohet një probabilitet më i lartë për reshje mbi mesataren në një pjesë të madhe të kontinentit.
Megjithatë, bëhet fjalë për parashikime shumë të hershme sezonale, të cilat mund të ndryshojnë ndjeshëm me afrimin e vjeshtës.
Dimri mund të sjellë një kombinim më interesant
Ndikimi më i theksuar i Super El Niños pritet gjatë dimrit. Sipas modelit aktual, zonat me presion të ulët mund të shtrihen drejt Evropës veriperëndimore dhe veriore.
Një konfigurim i tillë krijon një diferencë më të theksuar të presionit mes veriut dhe jugut të kontinentit, gjë që mund të forcojë më tej qarkullimin perëndimor nga Atlantiku drejt Evropës.
Rezultati kryesor mund të jetë një dimër më i butë, me temperatura mbi mesataren në pjesën më të madhe të kontinentit.
Megjithatë, kjo nuk do të thotë se e gjithë Evropa do të jetë pa depërtime të ajrit të ftohtë. Herë pas here, ajri i ftohtë mund të zbresë nga veriu drejt Mbretërisë së Bashkuar dhe Irlandës, si dhe në pjesë të Evropës veriore dhe veriperëndimore.
Bora nuk përjashtohet
Edhe pse nuk priten reshje të mëdha dhe afatgjata dëbore në pjesën më të madhe të kontinentit, sipas parashikimeve aktuale përjashtim mund të jenë pjesët veriore dhe verilindore të Evropës, si dhe zonat më të larta të Evropës Qendrore.
Me fjalë të tjera, Super El Niño deri tani nuk sugjeron një dimër klasik të ftohtë evropian, por më tepër një kombinim të motit më të ngrohtë, qarkullimeve të fuqishme atlantike dhe depërtimeve të herëpashershme të ajrit të ftohtë.
Megjithatë, deri në fillimin e dimrit kanë mbetur edhe disa muaj, ndaj parashikimet gjatë kësaj kohe pothuajse me siguri do të ndryshojnë. Super El Niño mund të ndikojë ndjeshëm në atmosferën globale, por nuk e përcakton i vetëm motin në një lokacion të caktuar.
