Nesër në Kosovë parashihet të kemi ndryshim të motit. Më në fund pas një periudhe të gjatë të qetë parashihet destabilizim i fuqishëm i atmosferës.
Paradite kryesisht me diell dhe jashtëzakonisht nxehtë e me zagushi, kurse pasdite do të fillojnë zhvillime mjaft të fuqishme konvektive të cilat do të shkaktojnë destabilizim të fuqishëm të atmosferës. Vende-vende do të fillojnë rrebeshe shiu me vetëtima dhe bubullimë të cilat pastaj do të vinë duke u organizuar dhe intensifikuar në pjesë të ndryshme të Republikës së Kosovës.
Parashihen stuhi të fuqishme lokale, me mundësi rrebeshe mjaft intensive dhe breshër e shkarkime të fuqishme atmosferike në zona të caktuara.
Temperaturat do të jenë shumë të larta deri në 38 gradë Celsius maksimalja, por me ardhjen e rrebesheve të shiut dhe erërave ato do të pësojnë ulje sidomos gjatë kohëzgjatjes së reshjeve.
Në Shqipëri, Maqedoninë Veriore, Luginë të Preshevës dhe Mal të Zi nesër pritet të mbajë mot shumë i nxehtë, fillimisht me diell, pastaj në rajone të caktuara destabilizim i fuqishëm i atmosferës, me rrebeshe lokale shiu e stuhi lokale me vetëtima, bubullimë dhe breshër. Në jug e perëndim të Shqipërisë kryesisht pa zhvillime.
Rrebeshe lokalisht intensive priten në Mal të Zi, Luginë të Preshevës, Shqipërinë veriore e lindore si dhe në shumë pjesë të Maqedonisë së Veriut. Natyrisht stuhitë do të jenë të izoluara e ndonjë mund të zhvillohet më shumë.
E diela më e qetë dhe pak më e freskët, megjithatë mbetet ende mjaft nxehtë. Pasdite parashihet ndonjë rrebesh lokal shiu me ndonjë vetëtima dhe bubullimë.
Fillimi i javës së re kryesisht me diell dhe i nxehtë ku mund të ketë zhvillime të izoluara./MeteoBallkan
