Edhe një javë pa reshje aq të nevojshme atmosferike, megjithatë nuk do të jetë tërësisht thatë, ngase masa më të ftohta ajrore do të bartin në vehte lagështi dhe reshje të dobëta atmosferike, reshje këto ende shumë të pakta duke pas para sysh nevojën e madhe për ujë.
Të hënën mbizotëruan vranësira të cilat nuk sollën reshje. Vetëm në disa rajone pati reshje të pakta.
Të martën sipas parashikimeve priten vranësira më të dendura të cilat edhe mund të kushtëzojnë reshje kryesisht të dobëta atmosferike orëve të pasdites. Në viset e ulëta priten riga shiu e në viset e larta malore do të paraqiten sërish reshjet e borës. Do vazhdojë ulja e temperaturave për shkak të rrymimeve të vazhdueshme ajrore nga veriu.
Këto vranësira do të jenë vetëm në Kosovë dhe pak në zonat përreth, sepse përndryshe në Shqipëri do të ketë kthjellime dhe diell.
Vranësirat do të vazhdojnë të dominojnë Kosovë edhe të mërkurën por pa reshje atmosferike ose mund të ndodhë ndonjë rigë e dobët. Në Shqipëri më shumë diell se vranësira.
Të enjten pak më nxehtë edhe në Kosovë, ku priten vranësira e intervale kohore me diell, ndërsa vranësira fillojnë të shfaqen edhe në Shqipëri, por pa reshje atmosferike.
E Premtja dhe fundjava vranësira në gati të gjitha viset, megjithatë nuk do të mungojnë intervale kohore me diell e në disa zona priten reshje të dobëta atmosferike.
Nuk përjashtohet mundësia që ndonjë mëngjes të kemi acar të dobët.
Pra, edhe një javë me reshje krejtësisht të dobëta atmosferike, por në aspektin termik priten të kemi ulje më të ndjeshme të temperaturave sidomos në zonat kontinentale më së shumti të Kosovës. Në Shqipëri më shumë diell.
Në Kosovë temperatura minimale pritet rreth 0 gradë Celsius, kurse ajo maksimale vështirë që do të shkojë mbi 14 gradë Celsius. Nëse ndonjë batë do të kemi kthjellim të motit atëherë do të kemi “minuse”. Në Shqipëri temperaturat ditore do të shkojnë mbi 20 gradë Celsius.
Ishte ky parashikimi javor i motit. Për reshje aq shumë të nevojshme duhet të presim ende. Nuk përjashtohet mundësia që të kemi ndryshime në parashikim sidomos kur bëhet fjalë për fundjavën dhe për çdo ndryshim eventual do të njoftoheni me kohë në postimet tona të përditshme./MeteoBallkan
