Një super-ciklon është fuqizuar në veri të Detit Adriatik dhe gjatë mëngjesit do të kalojë përmes pjesëve qendrore të Serbisë në drejtim të lindjes.
Për këtë arsye ndikimi i fuqishëm ciklonik do të ndjehet edhe në viset tona, fillimisht me erëra nga jugperëndimi e pastaj edhe me stuhi lokale shiu me vetëtima dhe bubullimë, ndërsa me kalimin e ciklonit në lindje do ti hapet rruga frontit të fuqishëm të ftohtë ajror nga veriu drejt jugut.
Në veri të Shqipërisë deri në qendër dhe Mal të Zi priten reshjet më të dendura të shiut, të cilat pastaj vende-vende priten edhe në Kosovë sidomos në zonat afër Shqipërisë e Malit të Zi më intensive.
Stuhi të forta me reshje të dendura shiu priten sonte që nga Sllovenia, pastaj në Kroaci dhe Bosnjë dhe Hercegovinë, por të ndalemi të viset tona.
Fillimisht me erëra jugore e perëndimore do të ketë reshje shiu e rrebeshe lokale me vetëtima dhe bubullimë, kurse gjatë mëngjesit ose paradites së ditës së hënë do të fillojnë të fryjnë erëra nga veriu e veriperëndimi dhe kjo shënon fillimin e depërtimit të frontit të ftohtë ajror me reshje shiu e në viset kodrinore-malore shumë shpejt do të fillojnë reshje shqote e bore. Reshjet frontale nuk do të zgjasin shumë dhe në fund të reshjeve mund të paraqiten reshjet e borës në disa ultësira të Rrafshit të Kosovës. Pasditen e së hënës reshjet do të pushojnë dhe do të fillojë kthjellimi gradual i motit dhe njëkohësisht temperaturat do të pësojnë ulje të mëtutjeshme duke shënuar edhe “minuse”. Gjatë ditës së hënë do të fryjnë erëra të ftohta.
E gjitha kjo që e përmendëm më lartë pritet të ndodhë gjatë 24 orëve të ardhshme.
Të martën pritet stabilizim i motit, por do të jetë mjaft ftohtë e në mëngjes e mbrëmje acar.
Do të jetë kjo edhe një shenjë mjaft serioze se dimri është shumë afër dhe temperaturat polare mund të pushtojnë viset tona shumë lehtë.
Janë shfaqur disa shenja se mund të kemi një përfundim dimëror të këtij muaji edhe me reshje bore dhe po ashtu një fillim dimëror të Dhjetorit, por këto sinjale ende nuk janë të sigurta dhe ndryshimi më i vogël në gjendjen sinoptike mund të ndryshojë tërësisht parashikimet nga modelet kompjuterike globale për parashikim të motit.
Sidoqoftë, pas temperaturave mjaft të larta ky ciklon dhe fronti i ftohtë ajror do të na sjellë atmosferë paksa më dimërore edhe pse ende pa borë serioze në ultësira, gjatë fundjavës së re ka disa gjasa për reshje bore, por kjo mbetet për tu ndjekur./MeteoBallkan















